निमा पोङ्स्युवा

धरान । धरान उपमहानगरपालिकाका मेयर हर्क साङ्पाङको खानेपानी अभियानको कोखा खोलाको पानी ल्याउन शेर्पा किदुक समाज अमेरिकाबाट ५ लाख ७५ हजार १४० रुपैया हस्तान्तरण गरिएको छ ।

आइतबार अमेरिकाबाट आएका समाजका निवर्तमान अध्यक्ष आङ टि शेर्पाले खानेपानीको लागि भएर उपरोक्त आर्थिक सहयोग हस्तान्तरण गरिएको हो । प्रोजेक्ट मेनेजर भनेर चिनिएका दत्त लिम्बुलाई मेयर हर्क साङ्पाङ सामु उक्त रकम हस्तान्तरण गरिएको हो । टि शेर्पाले नेपालमा रहेर हाल अमेरिकामा बस्दै आएकाहरुबाट दुई दिनमा संकलन भएको रकम भएको बताए । थप आर्थिक सहयोग आगामी दिनमा पनि गर्ने बताए ।

शेर्पाले आफु अमेरिकामा रहँदा विभिन्न मिडियाबाट गतिविधि हेर्ने गरेको बताए । आफु अमेरिकामा नै भए पनि गतिविधिले धरानमा रहेको आभास बनाएको बताए । अहिले भने प्रत्यक्ष भेटघाट गर्न पाएको बताए ।
त्यसैगरी सरिन ख्युङ्बा मार्फत विभिन्न ब्यक्तिले दिएको आर्थिक सहयोगबाट २३ थान पाईप मेयर साङ्पाङलाई हस्तान्तरण गरिएको छ । उक्त पाईपको मुल्य १ लाख ५० हजार बढि पर्न जान्छ ।

आइतबार कोखा खोलाको पानी ल्याउने अभियानमा जानकारी दिदै दत्त लिम्बुले ४५० थान पाईपको ७ हजार १५० दरले किनेको पाईको पैसा दिन बाँकि रहेको बताए । यो हिसाबले पाईपको पैसा दिन अव ३२ लाख १७ हजार ५०० दिन बाँकि देखिन्छ । उनका अनुसार अहिलेसम्म पाईप मात्र १ करोड ५४ लाखको किनेको जानकारी दिए ।

आइतबार नै पाईप खरिद गर्नको लागि भनेर बिर्खबहादुर राईको स्मृतिमा श्रीमती सुमित्रा राई र छिरा देवराज राईले दुई लाख नगद हस्तान्तरण गरेको छ । दार्चुलाका तोरण अवस्थिबाट दोस्रोपटक अष्ट्रेलियाबाट ९१ हजार पठाएको जानकारी दिए । दार्चुलाका तोरणले सर्दु खर्दुमा यस अघि ९० हजार रुपैया उपलब्ध गराईसकेको पनि जानकारी दिए ।

त्यसैगरी आइतबार नै धरान ८ का अम्बिका राईबाट नगद ४० हजार उपलब्ध गराएको छ । वडा नम्बर ७ बाट एक युवा एकसय अभियानले १७ जोर पन्जा हस्तान्तरण गरेको छ । यो अभिन्ताले यस अघि पनि सहयोग उपलब्ध गराउदै आएको छ । त्यसैगरी धरान ११ घर भै हाल हङकङ बस्ने छोरा चन्द्रकुमार राई र छोरी चिन कुमारी राईले बुवा आमाको नाममा पचास हजारको चेक हस्तान्तरण गरेको छ ।