रामेछाप – रामेछापको उमाकुण्ड गाउँपालिकाले सामुदायिक विद्यालयका प्रारम्भिक बालविकास सहजकर्ता (इसीडी शिक्षक) र विद्यालय कर्मचारीको तलब थप गरेको छ ।

नेपाल सरकारको गत जेठ १५ गते विनियोजन अध्यादेश, २०७८ अनुसार संघीय सरकारले दिएको ८ हजार रूपैयाँमा गाउँपालिका कार्यालयले ७ हजार थप गरी न्युनतम पारिश्रमिक १५ हजार पु¥याएको हो ।

त्यस्तै गरी ०७८ साउन १ गतेबाट लागु हुने गरी गाउँपालिका कोषबाट माध्यमिक तहमा कार्यरत् विद्यालय सहयाेगी कर्मचारीलाई संघीय सरकारले दिएको आठ हजारमा गाउँपालिकाले नाै हजार रूपैयाँ थप सहित मासिक तलब  १७ हजार पुर्‍याएको छ भने विद्यालय लेखापाललाई दिएको १३ हजार ५ सयमा गाउँपालिकाले ७ हजार ९ सय ८० रुपैयाँ थप गरि कुल २१ हजार ४ सय ८० रुपैयाँ पुर्‍याएको छ ।
गाउँपालिकाको प्रमुख शेर बहादुर सुनुवारले केही दिन अगाडि एक विद्यालय उद्घाटनको क्रममा बोले अनुसार आज गाउँ कार्यपालिकाको बैठक बसी पालिका प्रमुख सुनुवारको पहलमा गाउँपालिकाले तलब थप गरेपछि इसीडी शिक्षक र विद्यालय कर्मचारीहरूले खुसी व्यक्त गरेका छन् ।

तर अझै अन्य कतिपय स्थानीय तहहरुले प्रारम्भिक बालविकास सहजकर्ता र विद्यालय कर्मचारीको थप भएको तलब दिन इन्कार गरिरहेका छन् । जसले गर्दा बालविकास र विद्यालय कर्मचारीहरुले पटक–पटक पालिकामा गएर धर्ना दिने लगायत आन्दोलनका कार्यक्रम गर्दै आइरहेका छन् ।

गाउँ कार्यपालिकाको सोही बैठकले आजै उमाकुण्ड गाउँपालिकाको शैक्षिक गुणस्तर वृद्धि गर्न शिक्षा तर्फ कुल २ कराेड ४१ लाख ३६ हजार ८ सय १० रूपैयाँ निसर्त बजेट विनियोजन गरिएको शिक्षा, युवा तथा खेलकुद शाखाको प्रा.स ङावा शेर्पाले जानकारी दिनुभयो ।

शिक्षा शाखाले यस अघि नै गाउँपालिका भित्रको समग्र विद्यालयहरू अनुगमन तथा निरीक्षण गरी सबल र प्रतिबद्ध शिक्षक, खुसी विद्यार्थी सहित उत्कृष्ट सिकाई उपलब्धि हासिल गर्नका लागि आवश्यक बजेटको खाका तयार पारिसकेको छ ।

२०७२ सालको भुकम्पले क्षति पुगेका धेरै जसो विद्यालयहरूका भौतिक पूर्वाधार तयार भैसकेको कारण अबको बजेटलाई सही कार्यान्वयन गरी गाउँपालिकाको लक्ष्य अनुसार नतिजा निकाल्न तिब्र रुपमा शैक्षिक विकास गर्ने हाम्रो जिम्मेवारी रहेको प्रा.स शेर्पाले शिक्षासंग सम्बन्ध राख्ने सबैलाई आग्रह गर्नुभयो ।अझै गाउँपालिका भित्रकाे सबै माध्यमिक विद्यालयमा उद्यम कार्यक्रम संचालन गर्ने उद्धेश्य अनुसार “अबकाे सामुदायिक विद्यालयलाई उद्याेगकाे रूपमा जाेडिनु पर्छ र शिक्षालाई सीप, श्रम र उत्पादन सँग जाेडिनु पर्छ, बालबालिकालाई विद्यालयबाटै उद्यमशीलता बनाउने गाउँपालिकाे महान अभियानसँग हातेमालाे गराैं भन्ने नारा सहित गाउँपालिकाले “एक शैक्षिक संस्था एक उद्यम कार्यक्रम संचालन कार्यविधि, २०७८” स्वीकृत गरिएको छ