इलाम । प्रदेश १ को नाम कोशी राखिएदेखि पहिचानको मुद्दा चर्चामा रहेको लेखाजोखा गरिने इलाम क्षेत्र नम्बर २ को उप निर्वाचनको मतगणना आइतबारदेखि हुने अनुमान गरिएको छ ।

शनिबार मतदान शान्तिपूर्ण सम्पन्न भएपछि यतिबेला मतपेटिकालाई निर्वाचन कार्यालय इलाम सदरमुकाम ल्याउने क्रम जारी छ । इलाम जिल्ला सदरमुकाममा रहेका संयुक्त नागरिक पार्टीका अध्यक्ष दलमर्दन कामीले निर्वाचन कार्यालयमा मतपेटिका जम्मा हुने क्रम जारी रहेको जनाएको छ । १४९ स्थानको मतपेटिका बिहान ४ बजेसम्म जम्मा भैसक्ने अनुमान गरिएको छ ।

मतपेटिका सबै जम्मा भैसकेको अवस्थामा सर्वदलीय बैठक बसेपछि मात्र मतगणना शुरु हुनेछ । मतगणना स्थलमा स्वच्छ निष्पक्ष गणना होस भन्ने उदेश्यले अहिले सिसि क्यामेरा जडान गरि गणना स्थल तयारी भएको कुरा दलमर्दन कामिले जनाएको छ । यस आधारमा हेर्दा छिटोमा आइतबार १० बजेदेखि मात्र मतगणना शुरु हुनसक्ने अनुमान गरिएको छ ।

आज सम्पन्न भएको इलाम क्षेत्र नं. २ काे कूल मतदाता-१,१५,८८९ जना रहेका छन । आज कुल झरेको मत ६९,२८७ छन । त्यसमा पूरुष-३५,१३५ मत महिला-३४,१५० र अन्य -२ मत रहेका छन ।कुल मतदान प्रतिशत ५९.७९ रहेको छ ।